മലയാളത്തിലെ പുതിയ റിലീസുകളില് ഏറ്റവുമധികം പ്രേക്ഷക ശ്രദ്ധ നേടിയ സിബിഐ 5 ന്റെ (CBI 5) റിലീസ് തീയതി പ്രഖ്യാപിച്ചു. സിബിഐ 5 ദ് ബ്രെയിന് (CBI 5 THE BRAIN) എന്നു പേരിട്ടിരിക്കുന്ന ചിത്രം മെയ് ഒന്നിനാണ് തിയറ്ററുകളില് എത്തുക (THEATER RELEASE). പെരുന്നാള് റിലീസ് ആയി എത്തുന്ന ചിത്രത്തിന്റെ റിലീസ് ഞായറാഴ്ചയാണ് എന്ന അപൂർവ്വ കൌതുകവുമുണ്ട്. ചിത്രത്തിന്റെ സെന്സറിംഗ് നടപടികള് പൂര്ത്തിയായതിനു പിന്നാലെയാണ് അണിയറക്കാര് റിലീസ് തീയതി പ്രഖ്യാപിച്ചിരിക്കുന്നത്. യു/എ സര്ട്ടിഫിക്കറ്റ് (u/a certificate) ആണ് ചിത്രത്തിന് ലഭിച്ചത്.
മമ്മൂട്ടിയുടെ (Mammootty) ഐക്കണിക് കഥാപാത്രമായ സിബിഐ ഉദ്യോഗസ്ഥന് സേതുരാമയ്യരുടെ അഞ്ചാം വരവാണ് ഈ ചിത്രം. കെ മധു- എസ് എന് സ്വാമി (K Madhu & SN Swami) കൂട്ടുകെട്ടില്ത്തന്നെ എത്തുന്ന ചിത്രത്തിന്റേതായി ഇതുവരെ എത്തിയ പ്രൊമോഷണല് മെറ്റീരിയലുകളൊക്കെ വലിയ പ്രേക്ഷകശ്രദ്ധ നേടിയിരുന്നു. മലയാളത്തിലെ കുറ്റാന്വേഷണ സിനിമകളില് ഏറ്റവുമധികം ആരാധകരെ നേടിയ ഫ്രാഞ്ചൈസിയാണ് സിബിഐ സിരീസ്. കാലത്തിനനുസരിച്ചുള്ള മാറ്റങ്ങളോടെയാണ് അഞ്ചാം ഭാഗം എത്തുന്നതെന്നാണ് തിരക്കഥാകൃത്ത് എസ് എന് സ്വാമി വ്യക്തമാക്കിയിട്ടുള്ളത്.
മുകേഷ് (Mukesh), സായികുമാര് (Sai Kumar) , രണ്ജി പണിക്കര് (Ranji Panicker) , ആശ ശരത്ത് (asha sharath), സൗബിന് ഷാഹിര് (Soubin Sahir), ദിലീഷ് പോത്തന് (Dileesh Pothan), അനൂപ് മേനോന് (Anoop Menon), പ്രശാന്ത് അലക്സാണ്ടര്, ജയകൃഷ്ണന്, സുദേവ് നായര്, അസീസ് നെടുമങ്ങാട്, സന്തോഷ് കീഴാറ്റൂര്, ഇടവേള ബാബു, പ്രസാദ് കണ്ണന്, കോട്ടയം രമേശ്, സുരേഷ് കുമാര്, തന്തൂര് കൃഷ്ണന്, അന്ന രേഷ്മ രാജന്, അന്സിബ ഹസന്, മാളവിക മേനോന്, മാളവിക നായര്, സ്വാസിക തുടങ്ങി നീണ്ട താരനിരയാണ് ചിത്രത്തില് അണിനിരക്കുന്നത്. തിരുവനന്തപുരം, ഹൈദരാബാദ്, ദില്ലി എന്നിവിടങ്ങളും ലൊക്കേഷനുകളാണ്.
